Malaumon si Top Rank boss Bob Arum nga mapahigayon ang panagharong nila ni World Boxing Organization (WBO) welterweight champion Terence Crawford ug Shawn Porter nga dili na mosubay sa purse bid.

Kon wala na’y mga kakulian, plano ni Arum nga opisyal nang ianunsyo ang away nga gikatakda karong Nobiyembre 20, 2021.

“We want it in Las Vegas at the Mandalay Bay, and we’re holding the arena for Nov. 20.”

Matod ni Arum, kinsa maoy nagdumala kang Crawford, nga nakigsabot na siya sa promoter ni Porter nga mao ang Premier Boxing Champions ug TGB Promotions aron ihan-ay ang tanan kabahin sa away.

Gipasabot ni Arum nga ang sama niini nga panagparang gikinahanglan nga mapahigayon aron makasugakod ug makalahutay ang boksing.

“If we are going to survive as a sport, you have to have the talented guys fight each other because that’s what people want to see,” pasabot ni Arum.

Si Crawford adunay 37-0, 28KOs nga rekord samtang si Porter naggunit og 31-1-3-1, 17 KOs nga baraha. (ESL)