NAKAABANTE sa knockout stage ang Croatia human nila gipangbuntog ang Argentina, 3-0, sa Group D nga pinatiray kagahapon sa World Cup sa Nizhny Novgorod, Russia.

Ang mga naka-goal alang sa Croatia mao sila si Ante Rebic, Luka Modric ug Ivan Rakitic.

Kini maoy labing dako nga kapildihan sa kanhi two-time world champion Argentina gikan niadto pang 1958 diin nasugamak sila sa 6-1 nga kapildihan batok sa Czechoslovakia.

Si Rebic maoy unang naka-goal alang sa Croatia sa ika-53 minutos sa duwa unya gisundan kini og laing goal ni Modric sa nahabiling 10 minutos.

Unya ang goal ni Rakitic gikan sa free kick maoy nagkompleto sa misyon sa Croatia, nga maoy ikaupat nga team nga nakasulod sa top 16.

“The most important objective has been achieved, we are ecstatic over it,” matod ni Modric.

Niini pa lang puntoha, daw dakong kalampusan na ang naabot sa Croatia kay dili lalim ang pagbuntog sa Argentina.

“We have to be happy, we have emerged from the group and we have beaten great Argentina with the greatest player in the world, Messi,” batbat ni Croatia coach Zlatko Dalic.

Ang Argentina nagkinahanglang modaog sa katapusan nilang tahas batok sa Nigeria aron makaabante sa sunod round. (Reuters)