SUKWAHI sa gilauman, dili madayon ang pagbalik og duwa ni Golden State Warriors superstar Stephen Curry karong adlawa (RP time) batok sa Washington Wizards sa National Basketball Association (NBA).

Sa ilang opisyal nga pamahayag, ang Warriors nagkanayon nga nakapraktis na’g tarong ang kanhi 2-time MVP apan dili kini nila gustong ahaton sa pagpaduwa.

Hinuon gitataw sa Warriors nga sulod ning buwana, makabalik ra og duwa ang ilang pambatong pointguard apan wala pa sila mohatag og petsa.

Si Curry nakasinati og bali sa iyang wa nga kamot atol sa kapildihan sa Warriors batok sa Phoenix Suns, 110-121, niadtong Oktubre 30 sa miaging tuig. Gioperahan si Curry duha ka mga adlaw human kini nahitabo. Sulod sa upat ka mga duwa sa wala pa siya naangol, si Curry nag-average og 20.3 puntos, 6.5 assists ug 5.0 rebounds. (AP, ESL)