MIKULIT og kasaysayan si James Deiparine sa unang adlaw sa swimming competition sa nagpadayon nga 30th Southeast Asian (SEA) Games, Miyerkules, Disyembre 4, sa New Clark City Aqua Center sa Tarlac.

Nalangkat ni Dieparine ang gold sa men's 100-meter breastroke pinaagi sa pagbuak sa 10 ka tuig nga record sa SEA Games ug naapsan ang iyang kaugalingong record sa Pilipinas, nga nagtapos sa usa ka dekadang kauhaw sa gold sa nasod sa maong kompetisyon.

Si Deiparine, ang silver medalist sa 2017 edition, mitali og 1:01.46 seconds aron siakon ang record sa SEA Games nga 1:01.60 nga nakulit sa taga Vietnam nga si Nguyen Huu Viet sa 2009.

Iya usab ng nabuak ang Philippine record nga 1:02.00 nga iya ra pud nga nahimo sa niaging SEA Games didto sa Kuala Lumpur.

Katapusang naka-gold ang Pilipias sa swimming niadto pang 2009. Niadtong higayona, ang milangkob sa team mao sila si Miguel Molina kinsa adunay naka-gold sa 200m u sa 400m individual relay, samtang sila si Daniel Coakley ug Ryan Arabejo mao usab ang midominar sa 50m freestyle ug sa 1,500m freestyle sa men's division.