GIPAKITA ni Carlo Demecillo nga andam na siyang mosagubang og mas dagkong mga away pinaagi sa pagrehistro og 4th round knockout nga kadaugan batok kang Jonathan Francisco sa main event sa Big Yellow Promotions “Fight Night III” sa Sabang Sports Complex.

Nagpauwan og sunodsunod nga body shots ang 23 anyos nga si Demecillo aron tumbahon si Francisco sa ika-2:50 minutos sa 4th round.

Si Demecillo misaka sa 14-5-1, 7KOs nga rekord samtang si Francisco natagak sa 10-13-1, 4KOs nga baraha.

Sa interbyu sa Sun.Star Cebu, nagkanayon si Big Yellow headcoach Christopher “Ping-Ping” Tepora nga sa iyang tan-aw, pang-world class ang abilidad ni Demecillo.

Ang manager ug promoter ni Demecillo nga si Seth Oliver Tio nagplano nga paawayon na niya’g regional title fight ang iyang batos sa sunod tuig.

Si Demecillo maoy kasamtangang World Boxing Organization (WBO) Asia-Pacific Youth bantamweight champion.

Sa supporting main event, si Clyde Azarcon (16-3-1, 6 Kos) miposte og 3rd round TKO nga kadaugan batok kang Garry Rojo (9-14-1, 5 Kos).

Sa lain pang mga away sa undercard, ningdaog sila si Rhonvex Capuloy (7-1, 4 Kos) batok Jeffrey Stella (4-9-3, 4 Kos) pinaagi sa unanimous decision, Elmer Naason (4-0, 3 Kos) batok Mark Anthony Rotilles (2-6, 1 KO) pinaagi sa 4th round TKO ug Kevin Smith Nemenzo (1-0, 1 KO) batok Marvin Campo (0-1) pinaagi sa 2nd round TKO. (EKA, ESL)