NAKALANGKAT og laing gold medal ang Cebuana skateboarder nga si Margielyn Arda Didal sa Pro Street category sa 7th Annual Exposure Women Skate kagahapon sa Encinitas Community Park sa Encinitas, California.

Ang lumad nga taga barangay Lahug, dakbayan sa Sugbo nakahatag na sab og dungog sa nasod human niya naangkon ang labing taas nga score sa kompetisyon, nga maoy labing dako sa women’s skateboarding event sa kalibutan.

Nakabulsa si Didal og $7,000 sa iyang kalampusan sa kompetisyon nga nagdalit og kinatibuk-ang ganti nga $60,000.

“So hype to skate and lucky to get first place,” post sa 19 anyos nga si Didal sa iyang Facebook account.

Moabot sa 40 ka skateboarders gikan sa nagkalainlaing mga nasod ang gikaparang ni Didal sa elimination round.

Human sa eliminasyon, 12 na lang ang nakaabante sa final round.

Ang torneyo tipik sa pagpangandam ni Didal alang sa iyang kampanya sa Tokyo Olympics qualifiers nga ipahigayon sa Brazil.

Ang mopatigbabaw nga 20 ka skateboarders sa Brazil event mao ang maka-qualify sa Tokyo Olympics nga ipahigayon sa Japan karong 2020.

Nabantog si Didal human siya nakatunol sa Pilipinas og gold medal sa 2018 Asian Games niadtong Septiyembre sa Indonesia.

Ning maong kalampusan, si Didal nakadawat og P6 million nga cash incentives sa kinatibuk-an. RSC, ESL