I-BAN sulod sa 15 ka tuig ang Filipino chess players nga masakpang manikas sa online tournament nga sanctioned sa National Chess Federation of the Philippines (NCFP)

Mao kini ang gipahibalo ni NCFP chief operating officer (CEO) ug national team Olympiad delegation head Jayson Gonzales.

Kining maong desisyon nakab-ot human na-disqualify ang Pilipinas sa Top Division sa 2021 Fide Online Olympiad ning bag-uhay lang sa dihang nasakpan ang usa ka player niini nga nanikas.

Ang NCFP wa mobutyag sa pangalan sa player ug wa usab motumbok kon chess engine o coaching ba ang kalapasan nga nahimo niini atol sa online match.

Sa samang higayon, moapelar na usab ang nasod kalabot sa desisyon sa FIDE human gisalikway ang nag-unang duha niini ka apelar.

Kon makadawat og positibong tubag, ang nasod mahimo pang makaduwa sa sunod round bisan pa man og kuhaan kini sa puntos sa nanikas. Apan daw og sa hugtanon ang FIDE sa ilang desisyon.(JBM)