MAS ganahan ang promoter sa bag-ong World Boxing Council (WBC) heavyweight champion British Tyson Fury nga makigbatok ang iyang batos sa usa ka unfication bout batok sa kababayang si Anthony Joshua kaysa dinaliang rematch batok kang American Deontay Wilder.

Sa usa ka interbyu nga napatik sa Reuters, giangkon ni Frank Warren nga dili dali ang iyang gustong mahitabo gumikan kay kinahanglan pa nilang hangyuon si Wilder, kinsa adunay “rematch clause” sa ilang kontrata alang sa trilogy.

Sa ikaduha nilang away niadto lang Dominggo, Pebrero 23, 2020 (RP time) sa las Vegas, kaduha gitumba ni Fury si Wilder sa wa kini ma-TKO sa 7th round.

Sa miagi lang adlaw, gipadayag ni Wilder nga gamiton niya ang rematch clause aron makabawos kang Fury.

Gitataw ni Warren nga buhaton niya ang tanan aron deretso nang makig-away si Fury kang Joshua, kinsa maoy naggunit sa heavyweight titles sa WBA, IBF, World Boxing Organizatin (WBO) ug International Boxing Organization (IBO).

“I prefer to go straight to Joshua but that’s the contract,” asoy ni Warren.

Hinuon giklaro ni Warren nga kon moinsister si Wilder, hayan wala sila’y mahimo kon dili ang pagsunod sa kontrata.

Gipasabot ni Warren nga andam silang mobayad kang Wilder aron mohatag lang kini’g agianan sa Fury-Joshua unification bout.

Ang promoter sa Joshua nga si Eddie Hearn nipadayag nang daan nga interesado sila nga makigharong kang Fury.

Sa kasamtangan, nakatakdang modepensa si Joshua sa iyang mandatory IBF challenger nga si Kubrat Pulev sa Bulgaria, posible karong Hunyo. (ESL)