MIPAKITA sa ilang puwersa ang defending champion Milwaukee Bucks aron lupigon ang San Antonio Spurs, 121-111, kagahapon didto sa San Antonio Texas.

Ang NBA Finals MVP nga si Giannis Antetokounmpo mipupo og 21 puntos ubanan sa walo ka rebounds, walo ka assists ug tulo ka blocks alang sa Milwaukee.

Samtang, ang sinaligan nga shooter sa Bucks nga si Chris Middleton midugang og 28 puntos aron ibalik ang Milwaukee sa kadaogan human kini gilat-an sa Miami, 95-137, niadtong Biyernes.

“Just find a way to bounce back,” matod ni Middleton. “It’s just how you adjust, how you respond to that. I think tonight, for the most part, the effort was in the right place.”

Si Middleton, Antetokounmpo ug Jrue Holiday nagtambayayong og 20 ka sunod-sunod nga puntos sa unang unom ka minuto sa fourth quarter aron hatagan og 107-98 nga labaw ang Bucks.

Nakadawat og maayong suporta si Antetokounmpo kay tanan nga starter sa Milwaukee mi-iskor og double figures, samtang si George Hill mitunol og 15 puntos gikan sa bench.

Si mipakita pud sa iyang katakos sa three-point shot diin miigo kinig magkasunod nga tres aron hatagan og 115-95 nga labaw ang Bucks sa nahabiling tres minutos sa duwa.

Si Jrue Holiday mitampo og 16 puntos sulod sa 25 ka minutos nga playing time.

Si Doug McDermott maoy nangulo sa Spurs sa iyang career-high nga pito ka 3-pointers ug 25 puntos, samtang midunolo si Keldon Johnson og 20 puntos. Ang Spurs gikan sa pilde batok Denver niadtong Biyernes. (RSC)