MILARGA na kagahapon paingon sa Taiwan ang Gilas Pilipinas alang sa ilang pagpakigbatok sa Chinese-Taipei alang sa umaabot nga third window sa FIBA World Cup Asian qualifier.

Pinangulohan nila ni Gabe Norwood, Jayson Castro, Japeth Aguilar, ug June Mar Fajardo, ang Gilas makigbatok sa Chinese-Taipei karong Biyernes sa Taipei Heping Basketball Gym.

Nahisakop sab sa Gilas sila si Terrence Romeo, Roger Pogoy, Troy Rosario, Baser Amer, Jiovani Jalalon, Allein Maliksi, Carl Bryan Cruz, Calvin Abueva, ug Matthew Wright.

Mokompleto sa 15-man line-up mao sila si naturalized Filipino center Andray Blatche ug Gilas Pilipinas cadet Troy Rike.

Nagtinguha ang Gilas nga masumpayan ang ilang kadaugan batok sa Chinese Taipei,90-83, niadtong Nobiyembre dihang ming-asdang mga Taiwanese sa Araneta Coliseum.

Bisa’g unsa pa’y resulta ning sangkaa, ang mga Pinoy makasulod ra gihapon sa ikaduhang round sa FIBA World Cup Asian qualifiers.

Apan wala kini nagpasab ot nga wala na’y bili kining duwaa alang sa Gilas gumikan kay kinahanglan gihapon niining modaog aron makahatag kanila og dugang kadasig alang sa sunod nilang mga tahas.

Ang Gilas nakatakdang mo-host batok sa Australia karong Hulyo 2 sa Philippine Arena sa Bocaue, Bulacan. (ESL)