SA MAKAUSA pa, saktong kastigo ang gihimo sa Gilas Pilipinas sa ilang ikaduhang misyon sa 30th Southeast Asian Games men's basketball sa Mall of Asia Arena.

Ning higayona, ang Pilipinas misandig double-double performance sa higanting Sugboanon nga si June Mar Fajardo aron ilubong ang Vietnam og hapit katunga, 110-69, aron pagkab-ot og luna sa semifinals round.

Si Fajardo, produkto sa University of Cebu Webmasters, mipakli og 23 puntos og 12 ka rebounds.

Nakahatag pa og kombati sa first quarter ang Vietnamese ug gitapos ang first half ng 12 puntos lang ang labaw sa Gilas, 52-40.

Apan pagsulod sa third quarter didto na nagsugod ang kabangis sa opensa sa Pilipinas kinsa mipaburot sa ilang bintaha, 80-57.

Giangkon ni coach Tim Cone nga naglisod sila sa sayong bahin sa panag-engkuwentro sa dihang nangigo ang Vietnamese-America nga si Chris Dierker kinsa nakapugnit na og 19 puntos sa first half.

Apan matod niya nga mipatugbabaw ra gihapon sa kauwahian ang kadagko ug kalagsik sa iyang mga batos.

Sila si LA Tenorio ug Vic Manuel mitali og tag 16 puntos, 12 gikan ni Troy Rosario ug laing 11 kang Stanley Pringle.

Double-figure usab sa laing Sugboanong higante nga si Greg Slaughter nga may 11 puntos.

Sa una nilang duwa, ila usab nga gidabodabohan ang Singapore, 110-58. Ilang ikasanka Sabado, Disyembre 7 ang Myanmar sa katapusang duwa sa elimination round.

Hinuon bisan sa kapildihan, ang Vietnam masulod gihapon sa sunod round nga may 2-1 nga baraha isip no. 2 sa ilang bracket. (JBM)