HUMAN sa ilang kampanya sa Olympic Qualifying Tournament sa Belgrade, Serbia, ang sunod tahas maoy tutokon og balik sa Gilas Pilipinas -- ug kini mao ang Fiba Asia Cup.

Ang headcoach nga si Tab Baldwin mibutyag nga mopahuway una ang team human matapos ang ilang kampanya sa OQT nga gituldokan sa 94-67 nga kapildihan sa mga kamot sa Dominican Republic kagahapon sa kadlawon, Hulyo 2, 2021.

Molungtad og tulo ka mga semana ang pagpahuway sa Gilas ug human niini, sugdan na nila ang ilang higpit nga preparasyon alang sa Fiba Asia Cup nga ipahigayon sa Indonesia karong Agusto 17-29, 2021.

Sa OQT, ang Gilas wala nakatilaw og daog sulod sa duha ka mga duwa nga hingpit nga nagpahanaw sa ilang paglaom nga makaduwa sa Tokyo Olympics.

Sa premiro nilang tahas sa OQT, ang Gilas nakahatag og saktong kombati una kini mingkuykbo sa world No. 5 Serbia, 83-76.

Sa ikaduha ug katapusan nilang tahas sa OQT, ang Gilas nakakombati sab og insakto sa 1st half apan nausab ang dagan sa estorya dihang mipahagsa ang Dominican Republik og 26-10 run sa third quarter.

Ang 12 ka sunodsunod nga puntos nga wa matubag sa Gilas ang naghatag og timaan nga miluta ang ilang kakulang sa kasinatian ug niini miinat ang bintaha sa Dominican Republic ngadto sa 65-51 human sa tulo ka mga quarters.

Gikan niini, wala na makapakita og labok ang mga Pinoy.

Mga puntos: Dominican Republic (94) - Liz 23, Solano 21, Torres Cuevas 20, Nunez Castillo 13, Francis Ramirez 5, Rojas 4, Araujo 4, Santos 2, Mendoza 2.

Gilas Pilipinas (67) - Heading 16, Kouame 10, Sotto 8, Navarro 6, Belangel 6, Abarrientos 6, Baltazar 5, Tamayo 5, Nieto 4, Go 1, Chiu 0. (JBM)