ANG pag-inat sa ilang bintaha sa series maoy tuyo sa Golden State Warriors ug coach Steve Kerr sa Game 2 karong buntag sa best-of-seven Western Conference finals batok sa Portland Trail Blazers.

Mosulod sa korte nga 1-0 nga record sa serya, ang Warriors dili gihapon makabaton sa serbisyo ni Kevin Durant kinsa padayon nga nagpaalim sa iyang angol sa bagtak.

Hinuon si Kerr andam gihapong mogamit sa iyang mga second stringers kinmaayo usab nga nakasuporta sa ilang opensa nila ni Stephen Curry, Klay Thompson ug Draymond Green aron buntogon ang Blazers, 116-94.

Si Quinn Cook, ang reserve guard sa Warriors, mipasabot nga ang paghatag og kahigayonan sa uban maoy prinsipyo sa team ug kini napamatud-an na nila sa miaging katuigan.

“Obviously, we have the star power. But I think what makes this team so special is the guys who don’t get the recognition who come in off the bench and who put the work in daily,” matod ni Cook.

Si Green nagkanayon usab nga lisod ang team kon mawagtangan og player nga sama ka kalidad ni Durant. Hinuon matod niya nga sa ingon ining sitwasyon, adunay daghang nga gustong mo step up aron matapakan ang nahaw-angan ni Durant, ug kini basi usab sa nangagi nilang duha ka mga duwa.

Sa pikas bahin, gisuhid sa Trail Blazers ang video sa ilang duwa sa Game One ug didto ilang nasuta ang mga kasaypanan. Miabot ngadto sa 21 ka turnovers nga naghatag og 31 puntos sa Warriors, ila usab nasigpatan ang kahinay sa ilang depensa.

Ang hugot nga guwardiya sa Warriors ngadto nila ni Damian Lillard ug CJ McCollum maoy nakapugdol sa ilang opensa. (JBM)