MIPAHAGSA si James Harden og 57 puntos, apan nasayang lang ang tanan human nga ang Houston Rockets napukan sa Memphis Grizzlies, 126-125, pinaagi sa overtime kagahapon sa National Basketball Association (NBA).

Kadto maoy ikaduhang pildi sa Houston sulod sa ilang uwahing 14 ka mga duwa.

Ang panaghugpong nila ni Mike Conley nga may 35 puntos ug Jonas Valanciunas nga nakakulit og career-high nga 33 puntos, lakip na ang iyang free throw nga maoy nakapadaog, maoy nahimong mahait nga puwersa sa Memphis.

Napasulod ni Valanciunas ang iyang unang free throw sa nahabiling 0.1 segundos human siya nakakuha og foul gikan ni Clint Capela. Nasipyat man tuod ang ikaduha apan igo ra usab kini sa pagkapupos sa oras.

Gawas sa puntos, si Valanciunas milangkat usab og 15 ka rebounds.

Ang Rockets mipabuto og 17-2 nga rally sa fourth quarter, 15 niini gikan ni Harden, aron tablahon ang regulation period, 115-115. Ang tulo ka free throws ni Harden sa nahabiling kuwatro segundos maoy naghatod sa overtime.

Sa fourth quarter ug sa overtime, si Harden, kinsa aduna usay walo ka assists, nakapuga og 28 puntos sa fourth quarter ug sa overtime.

Si Chris Paul mitali og 18 puntos alang sa Houston, Capela mitapi og 14 puntos ug 10 ka rebounds.

Samtang sa laing duwa, nagmangtas si Joel Embiid human kini mipakli og 27 puntos, 22 ka rebounds ug usa ka block ngadto ni Kyrie Irving sa katapusang 35 segundos aron giyahan ang Philadelphia Sixers sa makutas nga kadaugan, 118-115, batok sa Boston Celtics.

Maayo usab nga nakaayudad si Jimmy Butler nga may 22 puntos, 15 niini sa katapusang kanto samtang 21 ang natampo ni Tobias Harris alang sa Sixers.

Ang Sixers (47-25) mao karon ang naghupot sa ikatulong puwesto sa Eastern Conference playoffs.

Si Irving mitali og 36 puntos alang sa Celtics nga nakapuwesto sa ikalimang luna.

Giputol sa Miami Heat ang siyam ka sunodsunod nga daog sa San Antonio Spurs pinaagi sa pagkulit og 110-105 nga kadaugan.

Si Goran Dragic mitali og 22 puntos sa maong kadaugan nga maisip nga katapusan na usab nga duwa ni Dywane Wade sa San Antonio.

Midugang si Dion Waiters og 18 puntos ug 15 gikan ni Josh Richardson alang sa Miami. (AP, JBM)