MIPABAHA og 58 puntos si James Harden nga gakaluhaan og 10 ka assists ug pito ka rebounds sa dihang gipapas sa Houston Rockets ang 21 puntos nga labaw sa Miami Heat kagahapon aron kuliton ang 121-118 nga kadaugan sa nagpadayon nga National Basketball Association (NBA).

Kuwang na lang siya og tres puntos aron iyang matupngan ang pinakataas nga puntos nga iyang nakulit niadtong Enero 23 didto sa New York. Mao usab kini ang pinakadako niyang puntos batok sa Miami Heat nga nagbuak sa record nga 53 puntos ni Willie Burton sa Philadelphia niadtong 1994.

Midugang og 17 puntos si Austin Rivers, nakatampo usab og tag 14 sila si Chris Paul ug Gary Clark alang sa ikaupat nga sunodsunod nga daog sa Rockets.

Sila si Kelly Olynyk ug Goran Dragic mitapik og tag 21 puntos alang sa Miami kinsa lab-as pa kaayo sa ilang pagbuntog sa Golden State Warriors sa niaging adlaw pinaagi sa tres ni Dwyane Wade.

Ang Warriors kagahapon nasugamak na usab og kapildihan, ug ning higayona, sa mga kamot sa Orlando Magic, 103-96.

Sulod ning semanaha, napukan sab sa Magic ang Eastern Conference powerhouse Toronto Raptors nga nakapamatuod as ilang kapabilidad batok sa mga lig-ong team.

Hinuon sa usa ka salikwaot nga senaryo, nakatilaw sila og pilde sa mga huyawng og puwersa nga mao ang New York Knicks ug Chicago Bulls.

Si Gordon maoy nangulo sa kadaugan sa Magic batok sa Warriors pinaagi sa iyang 22 puntos ug 15 rebounds, nidugang og 16 puntos si Terrence Ross samtang nitunol og 14 puntos si D.J. Augustin.

Tanang mga magduduwa sa Magic nga ningpakita og aksyon pulos nakatampo sa opensa.

Ning duwaa, naputol sa Magic ang ilang 11 ka sunodsunod nga kapildihan batok sa Warriors.

Katapusang mingdaog ang Magic batok sa Warriors niadto pang Disyembre 14, 2012.

Ang Warriors gipangulohan ni Stephen Curry pinaagi sa iyang 33 puntos, Klay Thompson ug DeMarcus Cousins nidugang og 21 puntos matag usa alang sa Warriors.

Ning sangkaa, ang Warriors ningkombati nga wala ang duha sa ilang mga sinaligan nga sila si Kevin Durant ug Draymond Green. Si Durant gipapahuway sa Warriors samtang adunay sakit si Green. (AP, ESL)