Bag-ong tahas ang huptan sa Sugbuanong sportsman nga si Edward Hayco human kini gitudlo isip commissioner sa Philippine Sports Commission (PSC).

Pormal nga nihurar si Hayco atubangan mismo ni Executive Secretary Lucas Bersamin niadtong Disyembre 28, 2022, sa kaulohan.

Si Hayco kanhi chairman sa Cebu City Sports Commission sulod sa 12 ka tuig. Sa iyang termino, gipalambo niya ang grassroots sports program sa dakbayan nga nakakaplag og dekalidad nga mga atleta di lang sa paugnat sa kusog apan lakip pa na ang character development sa batan-on.

Lakip sa mga prominente nga atleta nga gikan sa grassroots program sa CCSC mao sila dancesport duo Wilbert Aunzo ug Pearl Marie Cañeda.

Ang nabuhat ni Hayco sa grassroots program sa dakbayan maoy nagtuboy kaniya ngadto sa mas dako nga tahas.

“Sports stakeholders who believed in our grassroots program endorsed me for commissioner of Philippine Sports Commission,” batbat ni Hayco, kinsa founder sa Dancesports Team Cebu City.

“I was requested to be in Manila to accept the appointment. Our region will be blessed with this rare opportunity and will endeavor to serve Cebu from a new perspective.”

Dungan nga na-appoint ni Hayco isip bag-o nga commissioner mao ang kanhi national fencer ug Olympian nga si Walter Francis Torres.

Kauban ni Hayco ug Torres nga commissioner mao si bowling legend Bong Coo.

Sa samang adlaw, gitudlo ni President Ferdinand “Bongbong” Marcos Jr. si Richard Bachmann isip bag-ong chairman sa PSC hulip kang Noli Eala.