OPISYAL nang sakop sa Phoenix Fuel Master ang Sugboanong si Brian Heruela human kini nakapirma na og kontrata.

Uban ni Heruela isip mga bag-ong miyembro sa Phoenix Family mao si Jansen Rios.

Ang duha pulos gipapirma og tagsa ka tuig nga kontrata sa Fuel Masters sa niaging semana.

Si Heruela nakuha sa Phoenix gikan sa Blackwater baylo sa laing Sugboanon nga si Ron Dennison samang si Rios ilang nabitik human nga wala na mabag-ohi sa iyang kontrata sa NLEX.

Ang duha pulos naila sa ilang pagka defensive player nga maoy prayoridad ni coach Louie Alas.

Ang paghidugang ni Heruela sa Phoenix makapalig-on sa ilang backcourt diin iyang ikatimbang sila si Alex Mallari, RJ Jazul, RR Garcia ug Mike Gamboa.

Si Rios, sa iyang bahin, makatabang sa wingside sa Fuel Masters ilabi na nga wa pa gyud matino kon unsa ang status ni Calvin Abueva kinsa padayon pang gisuspenso sa PBA.

Samtang wa pa usay kasiguroan ang kahimtang ni Sol Mercado kinsa wala pa makapakita sa ensayo sa Phoenix.

Apan matod pa sa manager ni Mercado nga si Richard Dy nga mismo ang management maoy mitambag kang Mercado nga di lang usa paapili sa ensayo tungod kay gusto p-a nila tan-awon ang kinatitibuk-ang lineup sa team.

Sutaon una nila kon aduna pa bay igong luna nga kabutangan ni Mercado kinsa ilang nakuha gikan sa Ginebra. (JBM)