Kanhi star sa Philippine Basketball Association (PBA) mao na karon ang nagkupot sa ikaduha nga labing taas nga pwesto sa dakbayan sa Sugbo.

Siya si Donaldo “Dondon” Hontiveros 44, ang number one City Councilor sa Cebu City ang nanumpa atubangan ni kanhi bise mayor ug karon Mayor Michael Rama para maoy mohulip sa posisyon nga iyang biyaan gumikan sa pagtaliwan ni Mayor Edgardo Labella niadtong Nobiyembre 19, 2021 sa edad nga 70.

“Never gyud ug wala gyud ko naghunahuna nga moabot ni karon sa akong kinabuhi,” tubag pa ni Hontiveros kon niabot ba kini sa iyang pangandoy dihang una siyang nitikang sa ganghaan sa pulitika human sa iyang malampusong karera isip professional basketball player.

Ang nahitabo karon sa political career ni Hontiveros diin siya na ang opisyal nga presiding officer sa City Council sa mosunod nga 7 ka buwan daw nakit-an nang daan ni Labella niadtong 2019 apan sa wala damha, nagkahulogan diay kini sa iyang kamatayon.

“I never imagined nga mahimo kong ingon ani apan nahinumdom ko niadtong gikuyogan ko ni Mayor Edgardo Labella, he was then a vice mayor sa pag-file sa certificate of candidacy (COC) nga nakita niya ang akong sincerity ug niingon siya “Dong layolayo paka og maabtan, nakita nako nimo nga ganahan kaayo ka motabang, naa gyud kay chance nga ma-vice mayor ana,” paghinumdom ni Hontiveros.

Matod pa sa kanhi PBA star nga wala gyud siya malimot sa giistorya ni Labella niadtong tungora sanglit gikan sa Office of the Vice Mayor nga nahimutang kapin 200 metros ra ang gilay-on ngadto sa Comelec Office diin sila naglakaw aron mahimo na siyang opisyal nga kandidato pagkakonsehal niadtong higayona.

Gumikan sa bag-ong tahas karon ni Hontiveros, mobakasyon una siya iyang sideline nga trabaho isip assistant coach sa Phoenix Super LPG nga maoy iyang team sa PBA aron makatutok sa iyang trabaho sa city council.

“Yes nahibawo na ang Phoenix management and even my friends from San Miguel group daghan kaayo nag-message and our players from Phoenix nipadala na usab sa ilang mensahe. I am looking forward to joining them but I have a bigger responsibility to the Cebuanos,” paghulagway sa first termer councilor nga karon bise mayor na.

Si Hontiveros niduwa og 17 ka tuig sa PBA nga nagsugod niadtong tuig 2000 ug natapon sa SMB niadtong 2002 hangtod 2011, Air 21 Express sa 2011 ug nabalik ra usab sa Petron Blaze Boosters sa samang tuig hangtod 2012 ug sa Alaska Aces sa 2012-2017 diin siya nagretiro ug katapusan siyang niduwa sa Asian Basketball League sa 2018.

Siya nakahipos og tulo ka championships sa PBA, 1 sa ABL ug nahimong All Star sulod sa 13 ka higayon, champion sa three-point shootout niadtong 2007, sportsmanship awardee niadtong 2005 ug daghan pang uban.