ANG dakbayan sa Lapu-Lapu pinaagi sa Lapu-Lapu City Sports Commission mopahigayon og managlahing paugnat sa kusog isip parti sa 2020 Lapu-Lapu Fiesta League sa sunod buwan.

Ang maong torneyo mopahigayon og individual events nga puwedeng duwaon nga adunay social distancing ug dili makalapas sa minimum health protocols nga gimando sa Inter-Agency Task Force (IATF).

Gianunsiyo sa Lapu-Lapu City Sports Commission sa ilang Facebook page nga ang kompetisyon maglakip sa individual events sama sa badminton, cycling, table tennis, fun shoot ug Opon Board Riding.

Ang badminton giplano karong Nobiyembre 14 ug 15, cycling sa Nobiyembre, table tennis sa Nobiyembre 9-13, fun shoot o practical shooting inig Nobiyembre 13 ug Open Board Riding sa Nobiyembre 13-14.

Ang Board Riding maglangkob sa kompetisyon sa standup paddle, longboard ug skateboard, samtang ang cycling adunay mga kategoriya sa Road B, Road C, MTB Open, MTB Beginners, Road Golden, Folding ug LGU/Executive.

Dili lang ang tradisyonal nga paugnat sa kusog ang gihimo sa Lapu-Lapu Sports Commission kay aduna pud sila’y gibuhat nga kompetisyon alang sa mahiligon sa esports nga Mobile Legends Bang Bang.

Ang Mobile Legends mao ang labing sikat nga mobile games karon ug gani nalakip kini sa duwa sa 30th Southeast Asian (SEA) Games sa kaulohan niadtong Disyembre, 2019 diin gibulsa sa mga Pinoy ang gold medal.

Ang Lapu-Lapu Mobile Legends Bang Bang tournament ipahigayon karong Nobiyembre 5- 6.

Ang dakbayan sa Lapu-Lapu ug tibuok Rehiyon 7 gipaubos na sa Modified General Community Quarantine nga mao ang pinakaubos nga quarantine measure nga gimando sa IATF.