MOOTAGAKTAK na sab ang singot sa utok sa mga mahiligon og chess ning maong weekend gumikan kay lima ka online tournaments ang ipahigayon sa Cebu Executives and Professionals Chess Association (Cepca).

Duha ka mga torneyo ang ipahigayon karong adlawa nga mao ang Cepca Eladio Lim III Arena ug Cepcan Amado Olea Jr. Tournament.

Ang unang torneyo sugdan sa alas 2:00 sa hapon alang sa mga Group B Cepcan/ Ladies nga gi-sponsoran ni Engr Eladio Lim III, sundan kini sa Cepcan Amado Olea Jr tournament sa alas 8:00 sa gabie.

Ang Amado Olea Jr tournament abli alang sa tanang mga miyembro sa Cepca. Ang mga modaog niini makadawat og premyo gikan sa birthday celebrant nga si Olea.

Ipadayon sa Cepca ang ilang torneyo ugma pinaagi sa Prexy Jerry Maratas Arena sa 2:00 sa hapon.

Para kini sa Group B Cepcans/Ladies nga manunuwa.

Ang maong torneyo gipaluyohan ni Cepca president Engr. Jerry Maratas.

Makadawat gihapon og premyo ang Top 5.

Ang ulahing duha ka torneyo mao ang gipaabot sa tanang chess players kay abli man kini sa bisan kinsa nga players.

Mao kini ang Cepcan Alex Chua Superblitz 3 nga sugdan sa alas 5:30 sa hapon ug HWD Juno 325 sa alas otso sa gabie.

Ang Cepcan Alex Chua Superblitz 3 mohatag og ganti sa Top 12 players.

Ang kampiyon makabulsa og P1,000 gikan sa isponsor nga sila US-based Cepcans Engr. Alex Chua sa Los Angeles, California ug Engr Josito ‘Jojo’ Dondon sa Allen, Texas.

Ang HWD Juno 325 mao ang mosirado sa laing weekend chess tournament sa Cepca. Ang Top 10 players makadawat og ganti. (RSC)