HUMAN sa ilang duha ka sunodsunod nga yanong kadaugan sa National Basketball Association (NBA) Summer League, ang Miami Heat nakasugat na og malisod nga pagsuway kagahapon sa Las Vegas, USA.

Hinuon sa pagpangulo nila ni Tyler Herro ug Kendrick Nunn, nakamaneho lang gihapon ang Heat sa pagposte’g laing kadaugan batok sa Orlando Magic, 96-92.

Si Herro nagpakatap og 25 puntos samtang nidugang si Nunn alang sa Heat, nga nagpabiling wala’y pilde sa kompetisyon nga gisalmutan og 32 ka teams lakip na niini ang dili mga sakop sa NBA.

Nakig-uban ang Heat sa Boston Celtics, Memphis Grizzlies, Detriot Pistons ug Minnesota Timberwolves sa mga puwersa nga adunay 3-0 nga rekord.

Ang Heat maoy mirehistro sa usa sa labing dakong kadaugan sa kompetisyon dihang ilang gipanglubong og 41 puntos ang China, 103-62.

Ang Magic gipangulohan ni Amile Jefferson pinaagi sa iyang 24 puntos ug 15 rebounds.

Sa laing duwa, ang kasamtangang kampiyon sa NBA nga mao ang Toronto Raptors ningmakmak sa New York knicks, 85-73.

Gipangulohan ni Chris Boucher pinaagi sa iyang 23 puntos samtang nihatag og 19 puntos si Malcolm Miller.

Ang Raptors adunay 1-2 nga rekord samtang ang Knicks natagak sa 0-3 nga baraha.

Ang Knicks gipangulohan ni RJ Barrett pinaagi sa iyang 17 puntos ug 10 rebounds.

Sa lain pang mga duwa, ningdaog ang Oklahoma City Thunder batok sa Crotia, 84-76, Atlanta Hawks batok sa Indiana Pacers, 87-67, Utah Jazz batok Portland Trailblazers, 97-93, Memphis Grizzlies batok Phoenix Suns, 79-69.

Midaog ang Boston Celtics batok Denver Nuggets, 95-82, ug Houston Rockets batok Sacramento Kings, 94-92, Los Angeles Clipper batok Washington Wizards, 90-72. (AP, ESL)