ANDAM si Mark Magsayo sa MP Promotions moaway sa bisan kinsa nga kontra ang ihatag kaniya karong Oktubre 3 sa Microsoft Theater, Los Angeles, human moatras iyang orihinal nga kontra nga si Jose Haro.

Ang away ni Magsayo ug Haro gikatakda unta sa Septiyembre 23 apan mi-anusiyo ang ulahi nga mo-retiro na siya sa boksing.

Si Magsayo nagkanayon nga nagpadayon ang iyang training og nakabuhat na siyag 50 ka rounds nga sparring sukad sa iyang pag-abot sa Estados Unidos duha na ka buwan ang milabay.

Ang ka-sparring ni Magsayo mao sila Armenian superbantamweight Azat Hovhannisyan ug kanhi WBC superlightweight champion Viktor Postol sa wa pa iyang duwa batok kang Jose Carlos Ramirez sa miaging buwan.

Matod sa International Boxing Federation (IBF) No. 4 rank Magsayo sa PhilBoxing.com nga gipun-an ni Freddie Roach ug mas dagko nga Mexicano sa iyang sparring session.

Nakurat ang boxing scene sa dihang gi-anunsiyo sa 33-anyos nga Amerikano nga si Haro iyang pag-retiro tulo ka semana sa wala pa ang ilang away ni Magsayo nga isalida sa Premier Boxing Champions.

Sa iyang Facebook video post, si Haro miingon nga nag-positibo siya sa coronavirus disease (Covid-19) test mga duha na ka buwan nga milabay. Naayo hinuon kini og gitugotan na sa iyang doctor nga makabalik sa gym.

Gidugang ni Haro nga human niadto gihangyo siya sa iyang mga anak nga moretiro nalang.

Wala kauyon si MP Promotions head Sean Gibbons sa kalit nga pag-atras ni Haro. Matod niya nga mipahibawo unta si Haro nga mi-positibo siya sa Covid-19 ug di na modayon sa layo pa ang duwa aron makapangita dayon sila’g lain nga kontra.

Si Gibbons nangita na karon og ikapuli ni Haro alang sa debut fight ni Magsayo ubos sa MP Promotions nga gipanag-iya ni eight-division world champion ug Senador Manny Pacquiao.

Gilauman sa MP Promotions nga makaduwa og world title fight ang 26-anyos nga Bol-anon sa umaabot batok kang World Boxing Council featherweight champion Gary Russell Jr.

Si Magsayo, nga adunay limpyo nga record nga 20-0, nag-training ubos kang Roach ug strength/condition coach Justin Fortune.