Mga duwa karon:

3:00 pm- Ginebra batok San Miguel

5:45 pm- Talk N’ Text batok Meralco

Sugdan na ang semi-finals sa Philippine Basketball Association (PBA) Governor’s Cup, Biyernes, Marso 24, 2023, diin duha ka magsuong mga puwersa ang magpinaksitay pinaagi sa best-of-five series sa Ynares Center sa Antipolo City.

Sa premirong duwa, magsangka ang San Miguel Beermen batok Brgy. Ginebra Gin Kings sugod sa alas 3:00 sa hapon samtang magkombati ang Talk N’ Text (TNT) Tropang Giga batok Meralco Bolts sa main game.

Nagkanayon si San Miguel coach Jorge Gallent nga naglaum siyang grabe ka hugot nga engkuwentro ang ilang masugatan batok sa Gin Kings.

“Nothing comes easy now. It’s the playoffs... I’m expecting we’re gonna have a hard time in the semifinals,” matod ni Gallent nga napatik sa www.pba.ph.

Ang duha ka mga kampo pulos adunay piang sa ilang puwersa.

Wala si La Tenorio sa Gin Kings gumikan kay padayon kining nakigbatok sa sakit nga colon cancer stage 3 samtang wala sab sa Beermen ang Sugboanong higante nga si June Mar Fajardo, kinsa adunay angol sa iyang wa nga tuhod.

“We are playing well but San Miguel is playing probably the best in the league right now,” matod ni Ginebra coach Tim Cone. Sa laing parisan, nalantawan ang opensa batok depensa nga engkuwentro.

Ang Tropang Giga nag-average og 118 puntos ning maong komperensya nga maoy gigamit nila aron angkunon ang No. 1 nga puwesto human sa elimination round bawon ang 10-1 nga rekord.

Samtang ang Bolts maoy No. 1 team kon hisgutan ang depensa ning season-ending nga komperensya. (ESL)