NALEKSIYON sa ilang unang kapildihan, ang MJAS Zenith-Talisay City Aquastars mipukan sa KCS Computer Specialists-Mandaue City sa Game Two, 63-56, aron ihatod ngadto sa winner-take-all match ang finals series sa Chooks-To-Go Pilipinas VisMin Super Cup Visayas leg niadtong Sabado sa gabii, Mayo 8, 2021, sa Alcantara Civic Center sa lungsod sa Alcantara, Cebu.

Nahimutang sa delikadong sitwasyon human sa ilang 66-67 nga kapildihan sa Game One, ang Aquastars sayong miarangkada diin ilang nalimitihan ngadto lang sa kuwatro puntos ang Computer Specialists sa unang quarter, 16-4.

Apan ang Computer Specialists hinayhinayng migukod sa second period sa pagpangulo nila ni Ping Exciminiano, Joseph Nalos ug Raffy Octobre.

Ang three-point play ni Exciminiano maoy nakapasikit sa Computer Specialists, 23-24.

Nagpulipuli og sakmit sa labaw ang matag habig ug gitapos ang third quarter sa panagtabla, 41-41.

Sa sayong bahin sa ikaupat nga kanto, ang bigmen nga sila si Gryann Mendoza, Michole Sorela, nakigduyog ni Exciminiano sa opensa aron ituboy ang Compuer Specialists ngadto sa 48-41 nga bintaha.

Sa tinguha nga mapakgang ang pagpanghulog sa confetti ug balloons, ang Aquastars sa kalit lang mipaulbo og 16-2 nga rally nga giayudahan nila ni Jhaymo Eguilos, Paolo Hubalde, Egie Boy Mojica, Jaymar Gimpayan ug Shane Menina.

Ang tres ni Menina ug ang freethrows ni Hubalde sa katapusang tres minutos sa duwa maoy naghatag sa Talisay sa 57-50 nga labaw.

“The boys showed heart, ayaw talaga nila magpatalo,” matod ni Aquastars head coach Aldrin Morante sa interbyu sa Tiebreaker Times. “Pinakita nila yung character nila coming off a loss last night.”

Si Menina, kanhi sakop sa mythical five sa Cebu Schools Athletic Foundation Inc. (Cesafi), maoy nangulo sa Aquastars pinaagi sa iyang 15 puntos, lima ka rebounds ug lima ka assists samtang si Hubalde, kinsa mipakita na sa iyang kaagresibo sa opensa, mipakli og 11 puntos, unom ka rebounds ug upat ka assist.

Sa presstime, padayon pang gikombatihan ang deciding Game 3 kagabii.

Mga puntos:

MJAS-Talisay (63) – Menina 15, Hubalde 11, Cabahug 8, Gimpayan 8, Mojica 7, Jamon 4, Acuna 3, Eguilos 3, Villafranca 2, Mabigat 2, Santos 0.

KCS-Mandaue (56) – Exciminiano 14, Mendoza 11, Octobre 11, Nalos 4, Sorela 4, Imperial 4, Soliva 4, Cachuela 2, Bregondo 2, Tamsi 0, Roncal 0, Bonganciso 0, Delator 0, Mercader 0. Quarterscores: 15-4, 24-23, 41-41, 63-56. (JBM)