SA IKADUHA niyang tahas gikan sa iyang pagbalik human sa dugay-dugay nga panahon nga wala siya nakaaway, si Mark Magsayo mosagubang na dayon og dekalidad nga kontra.

Si Magsayo nakatakdang makigbatok kang two-time world champion Pungluang Sor Singyu alang sa inilugay sa bakanteng International Boxing Federation (IBF) Pan Pacific ug World Boxing Council (WBC) Asia featherweight titles karong Agusto 31 sa Bohol Wisdom Gym.

Ang away maoy main event sa “Pride of Bohol” boxing card nga gipasiugdahan sa Vladimir Boxing Promotions.

Alang kang Magsayo, kini nga away mao ang makahatag kaniya og oportunidad aron makasaka pagbalik sa world ratings nga grabeng pagkahagsa dihang 17 ka mga buwan siya nga wala nakaaway.

Sa interbyu sa SunStar Cebu, gipasalig sa 24 anyos nga si Magsayo nga buhaton niya ang tanan niyang makaya aron maagak niya pagbalik ang iyang boxing career.

Kasamtangang hugot nga nagbansaybansay si Magsayo sa Elorde Boxing Gym sa Manila.

Si Magsayo adunay 19-0, 14KOs nga rekord samtang ang beteranong si Sor Singyu naggunit og 53-6, 35KOs nga baraha.

Katapusang nakaaway si Magsayo sa Tagbilaran City niadtong Nobiyembre 25, 2017 diin iyang gipildi ang haponanon nga si Shota Hayashi pinaagi sa unanimous decision. Niadtong higayona ubos pa siya sa ALA Boxing Gym.

Apan human niadto, si Magsayo mitapon sa laing kampo apan wa gilayon kini makaaway tungod sa kasungian sa iyang kontrata sa ALA Boxing Gym.

Apan sa niaging Abril 12, human sa hataas nga panahon, mibalik og saka sa ring ang undefeated fighter ug ning higayona batok sa Indonesian nga si Erick Deztroyer kinsa iyang gi-knockout sa ikaupat nga round. (EKA, ESL)