Gitumba ni Floyd Mayweather ang hapon nga si Mikuru Asakura sulod sa ikaduhang round sa ilang special boxing exhibition match sa Saitama Super Arena didto sa Saitama, Japan kagahapon.

Ang 45-anyos nga si Mayweather milatigo og kumo sa mas batan-on nga si Asakura nga miresulta sa pagkatumba sa 30-anyos nga hapon sa uwahing bahin sa second round.

Hinuon, nakapabor si Mayweather sa maong away kay usa man ka mixed martial art practitioner si Asakura sa Rizin Fighting Federation ug dili professional boxer.

Gani mao pa kini ang unang boxing bout ni Asakura matod sa sportingnews.com.

Retirado na tuod sa professional boksing si Mayweather apan padayon kini sa pagdawat sa exhibition match nga pulos miresulta og dagko nga kita.

Ang maong duwa mao ang ikaupat nga exhibition match ni Mayweather sukad siya miretiro sa propesyonal boksing nga adunay perpekto nga 50-0 (win-lose) rekord.

Unang miaway si Mayweather batok ni kickboxer Tenshin Nasukawa sa Japan, gisundan kini sa ilang kombati ni internet personality Logan Paul sa Miami ug exhibition fight ni Don Moore sa Abu Dhabi.

Mismong ang Filipino boxing legend nga si Manny Pacquiao ang misaksi sa away ni Mayweather ug Asakura.

Si Pacquiao ug Mayweather maoy pinakasikat nga pound-for-pound boxer sa wa pa sila moretiro sa professional boxing. Nagsangka ang duha niadtong 2015 nga gitawag og Fight of the Century.

Midaog si Mayweather apan daghan ang miingon nga gasige ra daw og dagan ang Amerikanong boksidor nga murag nahadlok sa kumo ni eight-division champion. Nahisgotan ang posibleng rematch apan walay nahitabo hangtod nga miretiro nalang ang duha.

Nabuhi pagbalik ang istorya sa ilang posible nga rematch tungod sa pagsikat sa exhibition match.

Gani natakda na ang exhibition fight ni Pacquiao batok sa iyang kanhi sparring partner nga si Jaber Zayani sa Pebrero sunod tuig didto sa Riyadh, Saudi Arabia.