GIPABUHAGAY sa tag-iya sa TNT Tropang Giga nga si Manny V. Pangilinan ang iyang pagkasagmuyo sa officiating sa Game 3 sa Philippine Basketball Association (PBA) Philippine Cup finals niadtong Dominggo, Oktubre 24, 2021 sa Bacolor, Pampanga.

Pinaagi sa iyang opisyal nga Twitter account, gihulagway ni Pangilinan ang tawag sa mga referee sa maong duwa nga labing ngil-ad nga iyang nasaksihan.

Napilde man tuod ang Tropang Giga, 106-98, niadtong higayuna apan pabilin silang naglabaw sa best-of-seven series, 2-1.

“Worst officiating by far tonight I’ve seen,” tweet ni Pangilinan.

Ang Game 3 maoy labing pisikal nga kombati ning maong series diin nahatod sa ospital si TNT forward Troy Rosario human na-dislocate ang iyang wa nga kumigking. (ESL)