GIBASOL ni Los Angeles Lakers superstar LeBron James ang National Basketball Association (NBA) kabahin sa sunodsunod nga pagkaangol sa mga magduduwa sa liga.

Gipabuhagay ni James ang iyang pagbati human sa nahitabo sa pambato sa Los Angeles Clippers nga si Kawhi Leonard, kinsa maoy labing ulahing dekalidad nga magduduwa nga naangol.

“I Told You So,” post sa 4-time MVP sa iyang Twitter account nga nagtumbok sa desisyon sa NBA nga pamub-an ang kasamtangang season sa 72 ka mga duwa sa regular season imbes sa naandan nga 82 ka mga duwa.

Ning maong desisyon, kinahanglang piiton sa NBA ang ilang skedyul nga alang kang James maoy nakapahago og maayo sa mga magduduwa.

“They all didn’t wanna listen to me about the start of the season,” dugang tweet ni James.

“I knew exactly what would happen.” (AP)