ANG kanhi ALA boys nga si Donnie “Ahas” Nietes ug Albert Pagara andam na nga mobalik sa ring karong Abril 3 didto sa Dubai.

Ang kanhi four-division world champion nga si Nietes ug one-time world title contender nga si Pagara nalakip na sa umaabot nga fight card sa Dubai ubos sa ilang bag-ong boxing promoter nga MTK Global.

Taudtaod pud wala makaduwa ang mga pambato sa Sugbo tungod sa epekto sa pandemiya og sa pagkasirado sa ilang kanhi boxing stable nga ALA Promotions.

Gianusiyo sa ALA Promotions sa miaging tuig ang ilang pagsirado human sa 35 ka tuig nga operasyon tungod sa epekto sa pandemiya ug pagkasirado sa ilang partner network nga ABS-CBN.

Wala pa gipawas kon kinsa ang makontra ni Nietes ug Pagara sa ilang unang away ubos sa MTK Global, usa ka international promoter og boxing ug MMA events.

Ang uwahing away sa 38-anyos nga si Nietes niadto pang Disyembre 31, 2018, diin mikuha siya’g split decision nga kadaogan batok kang Kazuto Ioka sa Japan para sa bakante nga World Boxing Organization (WBO) super-flyweight nga titulo.

Mao kadto ang ikaupat nga titulo ni Nietes. Siya ang ikatulo nga Asian boxer na nakabuhat niini uban nila ni Filipinos Nonito Donaire Jr. ug legendary Manny Pacquiao.

Si Pagara uwahing miaway niadto gihapong 2018 diin mikulit siyag first-round win sa Ghanaian nga si George Krampah. (RSC)