DUGANGAN ni Presidente Rodrigo Duterte og P100 million ang gahin alang sa mga Filipino athletes nga mopakita og aksiyon sa 2020 Tokyo Olympics nga ipaagi ngadto sa Philippine Sports Commission (PSC).

Matod ni PSC chairman Butch Ramirez, nga ang iyang gipangulohang ahensiya magpaabot og dugang funding nga i-release sa Philippine Amusement and Gaming Corporation (Pagcor).

Ang maong gahin ilakip ngadto sa national sports development fund o NSDF, diin ang PSC mokuha sa ialng pundo alang sa training ug ingon man exposure sa gawas sa nasod sa mga national team members, partikulamente alang sa Olympics.

Gamiton usab kini sa PSC alang sa mga atleta nga mosalmot sa nagkalainlaing Olympic Qualifying tournament nga sugdan sa Enero alang sa Tokyo Games.

Kini gipahibawo sa Presidente atol sa pagpanghatag sa mga cash incentives sa mga medalists sa niaging Southeast Asian Games nga gipahigayon sa Malacanang sa niaging semana.

Sa pagkakaron, ang mga Filipino athletes nga nakasiguro na og luna alang sa Tokyo Olympics mao sila si Carlos Yulo sa gymnast ug EJ Obiena sa pole vault, apan gituohan nga madugangan pa kini sa higayon nga mosugod na ang Olympic Qualifying tournament sa sunod buwan. (JBM)