TALIWALA sa iyang makapakaging nga nasinating kapildihan, gihatagan lang gihapon si Filipino boxing legend Manny Pacquiao og hero’s welcome sa iyang pagbalik sa Pilipinas gikan sa Amerika kagahapon sa kadlawon, Agosto 30, 2021.

Nahitabo kini atol mismo sa pagsaulog sa nasod sa National Heroes’ Day.

Mapasalamaton ang Pambansang Kamao ng Pilipinas nga nagpanon sa kadlawong dako ang iyang mga sumosunod sa Terminal 2 sa Ninoy Aquino International Airport sa Manila aron makasiplat lang kaniya.

Si Pacquiao gikan sa iyang wala damhang unanimous decision nga kapildihan batok kang World Boxing Association (WBA) welterweight champion Cuban Yordenis Ugas niadtong Agosto 21, 2021 sa T-Mobile Arena sa Las Vegas, USA.

Ang mga sumosunod nagdala og placards ug tarpaulin aron ipadayag ang ilang suporta sa fighting senator, kinsa miabot kauban ang iyang asawa nga si Jinkee ug anak nga si Israel ug pipila ka mga sakop sa Team Pacquiao sakay sa Philippine Airlines Flight 103 gikan sa Los Angeles.

Giklaro ni Pacquiao nga wala siya magdahom nga aduna gihapon hero’s welcome nga mahitabo sa iyang paghiabot.

“Hindi ko akalain na sasalubong sila nang ganito. Sabi ko tahimik lang dahil talo naman tayo, hindi tayo nagwagi,” batbat ni Pacquiao sa interbyu sa GMA News.

“Laking pasasalamat ko dahil para na rin akong nanalo sa mainit na pagsalubong.”

Nangayo og pasaylo ang 8-division world champion ngadto sa iyang mga sumosunod nunot sa iyang kapildihan.

“Pasensiya na kayo, hindi tayo nagwagi, pero at least, lumaban tayo, hindi tayo sumuko,” matod ni Pacquiao, kinsa natagak sa 67-8-2, 39 KOs nga rekord.

Ang grupo ni Pacquiao ipasubay sa mandatory 10-day quarantine nga maoy gikinahanglan sa tanang ming-abot nga mga pasahero isip usa ka lakang sa padayong pagbatok sa Covid-19.

I-quarantine sila sa usa ka hotel sa Pasay City. (ESL)