DAW matuman na ang tinguha ni Manny Pacquiao nga ikaharong og balik si Floyd Mayweather Jr., kini kon tinuod ang labing bag-ong post sa American boxing legend sa social media.

Hinuon usa lang ka exhibition bout ang gustong mahitabo ni Mayweather ning higayuna.

“Money May, Money May, Money May . . . Money May all day,” post ni Mayweather sa iyang Instagram account.

“What I’m working on right now is the Mayweather-Pacquiao exhibition right here in Tokyo, Japan. Stay tuned.”

Madungog sab kining maong mga pulong sa usa ka video nga gilakip ni Mayweather sa iyang post.

“Mayweather vs. Pacquiao exhibition Tokyo Japan coming soon,” dugang post ni Mayweather.

Apan usa ka tinubdan ang mibutyag nga daw og sa dili interesado si Pacquiao sa usa ka exhibition match.

Gusto niini nga kinahanglang tinud-anay gyud nga fight.

Hinuon dili bag-o alang ni Pacquiao ang mga pasurprisang pamahayag ni Mayweather.

Sa miaging Agusto, usa ka video ni Mayweather ang nag-viral diin siya nipadayag nga moadto siya sa Saudi Arabia aron pagpakig-negotiate og mga promoter kalabot sa ilang rematch ni Pacquiao.

Apan sa sunod adlaw, si Mayweather, kinsa wala pay pildi sulod sa 50 ka away, niingon nga dugay ug karaan na ang maong video.

Katapusang nisaka si Mayweather ibabaw sa ring niadtong bisperas sa Bag-ong Tuig diin yano niyang gipaundang si Japanese kickboxer Tenshin Nasukawa.

Kon buot hunahunaon, katapusang niaway si Mayweather batok sa usa ka lehitimong boksidor niadto pang 2015 diin iyang gilupig si Andre Berto.

Niadtong 2017, nakig-away sab si Mayweather batok kang mixed matial arts (MMA) superstar Conor McGregor, kinsa iyanhg gipaundang sa ulahing bahin.

Sa iyang bahin, si Pacquiao nagpabiling aktibo human siya nasugamak sa unanimous decision nga kapildihan batok kang Mayweather sa premiro nilang away niadtong 2015.

Gikan sa premirong away nila ni Mayweather, unom ka mga away ang gisagubang sa Pambansang Kamao ng Pilipinas diin kausa ra siya nakatilaw og pilde batok kang Australian Jeff Horn.

Sukad pa kaniadto, si Pacquiao dayag sa iyang tinguha nga makigharong og balik kang Mayweather gumikan kay gusto siyang makabawos niini. (ESL)