KASONG pagpanglugos ang gipasaka sa Pardo Police Station batok sa inilang boksidor sa Sugbo nga si Albert Pagara niadtong Biyernes, Septiyembre 3, 2021, human makompleto ang mga ebedensya nga giingong nagmatuod nga nahitabo ang pagpanglugos.

Apan si Pagara mahimong makapiyansa sa kaso hinungdan nga naninguha ang iyang abogado sa pagpyansa kaniya niadtong Lunes, Septiyembre 6.

Sa pagsuwat ning taho sa Lunes sa hapon, matod ni Police Major Angelo Acupinpin, naa pa sa ilang kustodiya si Pagara.

Iya usab nga gihimakak nga nisuway sa paghikog si Pagara sukwahi sa mga taho.

“Sa atoang jailer, Sir, sa atong desk officer, wala may insidente nga nag ingon nga naay panghitabo nga nag attempt siyag pag pakamatay, Sir. Natingala gani ko sa mga news nganong naay news nga migawas nga ingun ana, Sir, nga where infact, didto sa atong custodial facility, wala may insidente nga nag attempt syag kutlo sa iyang kinabuhi,” matod ni Acupinpin.

Wala usab siyay nakita sa nawong ni Pagara nga naguol nga mamahimong hinungdan nga siya maghikog.

Matod ni Police Lieutenant Colonel Wilbert Parilla, deputy city director for operations sa Cebu City Police Office, nga ang mga abogado ni Pagara mihimog lakang nga makapyansa ang sinumbong.

***

Editor's Note: Ang estorya nga napatik sayo pa nga nag-ingon nga si Pagara gipagawas gikan sa bilanggoan gihulipan ning bag-o nga estorya. Si Pagara, ning pag-post, naa pa sa detention cell, wa pa gipagawas suma sa sayong taho. Mangayo kami og pasaylo sa sayop.