PADAYON ang maayong duwa sa pointguard sa Blackwater Elite nga si John Nard Pinto hinungdan nga napili siyang labing bag-ong Cignal-PBA Press Corps Player of the Week sa Philippine Basketball Association (PBA) Governor’s Cup.

Ang kanhi Arellano University court general usa sa mga instrumento kon nganong nagpatong sa solong liderato ang Elite sa Governor’s Cup bitbit ang 4-0 nga rekord.

Apan mialisngaw gyud ang abilidad ni Pinto sa iyang gipakitang duwa sa kulbahinam nga mga kadaugan sa Elite sa miagi nilang duha ka mga duwa batok sa NorthPort Batang Pier ug Brgy. Ginebra Gin Kings.

Ning maong mga duwa, si Pinto nag-average og 11.5 puntos, 9.5 assists ug 4.5 rebounds.

Sa laing bahin, ang Elite mopahugot og suway sa ilang paggunit sa solong liderato sa ilang pagpakigbatok sa NLEX Road Warriors sa premirong duwa karong hapon sa Smart Araneta Coliseum.

Dili ikalimod nga taas ang moral sa Elite ning sangkaa apan dili sila angayang molugak bisan gamay batok sa Road Warriors, nga naay 3-2 nga rekord.

Sa main game, mosuway pagbangon gikan sa pagkapandol ang Rain or Shine Elasto Painters sa ilang pagpakigbatok sa Magnolia Ang Pambansang Manok Hotshots.

Ang Elasto Painters nabunyagan og 104-110 batok sa talk N’ Text KaTropa sa usa ka out-of-town game sa Iloilo City niadtong Sabado sa Iloilo City.

Ang Hotshots, nga gikan sa kapildihan batok Phoenix Fuel Masters, 82-95, naghupot ng 2-1 nga rekord. ESL