PINAAGI sa push-ups, napatik sa alimpatakan ni Golden Boy Promotions CEO Oscar De La Hoya kon unsay angayan niyang buhaton aron makatabang sa pagpakigbatok sa makalilisang nga coronavirus disease (Covid-19).

Nagkanayon si De La Hoya nga sa miaging siyam ka mga adlaw, iyang giihap ang push-ups nga iyang nahimo.

Ang iyang matag push-up gitugbangan niya og $1.00 aron ihatag nga donasyon alang sa pag-alkontra sa Covid-19 nga ningkuyanap na sa tibuok kalibutan.

Sa iyang pagsumada, miabot og 250, 000 ang iyang nahimong push-ups hinungdan nga mikabat sab og $250,000 ang iyang gihatag nga donasyon alang sa mga kinahanglanon sa pagsumpo sa Covid-19.

Nanghinaot si De La Hoya nga himuon sab kini sa uban.

“The last nine days, I’ve done about 250,000 push-ups and for every push-up, I donated a dollar,” batbat ni De La Hoya sa interbyu sa TMZ Sports.

“So why don’t we do this, let’s challenge our peers, our friends, business leaders, politicians, or business or sports owners and donate money, create awareness."

Alang kang De La Hoya, kon daghan ang mohimo niini, mas dako ang matigom nga pundo.

"Imagine millions and millions of people doing this, we can help out a lot, a lot of people especially the people that are helping us in these hospitals,” dugang ni De La Hoya.

“You don’t need to donate crazy amounts but you could create awareness so America could start donating money as well.”

Nanawagan si De La Hoya sa iyang kanhi higpit nga karibal nga si Floyd Mayweather Jr. nga mosunod sa iyang gihimo.

Gihagit sab niya ang wala'y pildeng boksidor nga magtigi sila sa padaghanay og push-ups.

“Floyd, let’s match what I donated, for instance,” matod ni De La Hoya. “Or I challenge you to push-up contest. Whoever wins, you gotta donate more money. Let’s do this, let’s help people out.”

Si Mayweather, kinsa sama aduna na sab iyang kaugalingong promotional company, midaog batok kang De La Hoya pinaagi sa split decision sa ilang away niadtong 2007.

Ang ilang away maoy usa sa labing dako nga nahan-ay sa kasaysayan sa boksing.

Hangtod karon, ang duha ka retiradong mga boksidor naglinabayay lang gihapon og mahait nga mga pulong batok sa usa'g USA.

Ning pagsuwat, wala pa'y reaksyon si Mayweather kabahin sa hagit ni De LA Hoya. (ESL)