SA MAKAUSA pa, ang Columbian Dyip mao na usab ang nakakuha sa number one pick sa umaabot nga PBA Annual Draft pick karong Disyembre 8 didto sa Kaulohan.

Kini maoy ikaduhang sunodsunod nga season nga sila ang unang mopili sa mga applicants sa PBA.

Apan niadtong 2017, nakontrobersiya ang ilang paghupot sa no. 1 pick tungod kay mas gipalabi pa niini nga ibaylo ang ilang katungod ngadto sa San Miguel hinungdan nga ang Fil-German nga si Christian Standhardinger nga maoy no. 1 niadtong panahona didto mahilandig sa Beermen.

Hinuon wa na kini mahitabo sa niaging tuig tungod kay ang ilang no. 1 nga si CJ Perez, MVP sa NCAA, ila mang gipabilin sa team.

Gihugonhugonan karon nga si Thirdy Ravena maoy humot sa no. 1 pick sa umaabot nga 2019 PBA Rookie Draft pool.

Apan ang three-time UAAP Finals MVP wa pa makadesisyon kon mosalmot ba kini sa drafting. Ang deadline sa pagsumiter og application form alang sa mga locals ug Fil-foreigners gikatakda karong adlawa sa alas singko sa hapon. (JBM)