NAAPSAN ni LeBron James si Michael Jordan sa ikaupat nga luna sa scoring list sa NBA kagahapon. Kini taliwala sa laing kapildihan sa naghingutas nga Los Angeles Lakers, 99-115, batok sa Denver Nuggets kinsa mipadayag usab sa ilang pagdayeg ngadto ni James.

Ang layup ni James sa second quarter maoy nagtabon sa 32,292 puntos nga nakolekta ni Michael Jordan sa tibuok niyang professional career.

“You’ve got to appreciate him,” matod ni Garry Harris sa Nuggets kinsa mitali og 19 puntos. “We’re witnessing greatness. It’s an honor.”

Sa maong duwa si James mipakli og 31 puntos samtang si Will Warton maoy nangulo sa Nuggets nga may 23.

Ang kadaugan maoy nagputol sa tulo ka sunodsunod nga kapildihan sa Denver kinsa aduna nay 43-21 nga record, nga nagpatong sa ikaduhang luna sa Western Conference, sunod sa defending champion Golden State Warriors, 44-20.

Human sa iyang layup nga maoy nagmarka sa laing kasaysayan sa iyang karera, si James kinsa niadto lang pagsugod ning season mibalhin sa Lakers human sa 15 ka tuig sa Cleveland ug sa Miami, gisugat og standing ovation sa mga dumadapig sulod sa Staples Center.

Matataw nga atol sa timeout, sa dihang ang Lakers nagpasidungog ni James pinaagi sa video, ang four-time MVP awardee wa kapugong sa kaugalingon nga naghilak samtang nagtabon og tualya sa iyang nawong.

“A lot of stuff that I’ve done in my career, this ranks right up at the top (with) winning a championship,” padayag ni James. “For a kid from Akron, Ohio, that needed inspiration and needed some type of positive influence, M.J. was that guy for me. I watched him from afar, wanted to be like M.J., wanted to shoot fadeaways like M.J., wanted to stick my tongue out on dunks like M.J., wanted to wear my sneakers like M.J. I wanted kids to look up to me at some point like M.J., and it’s crazy, to be honest.”

Ang 34-anyos nga James mao na karon ang nagsunod nila ni Kareem Abdul-Jabbar (38,387 points), Karl Malone (36,928) ug Kobe Bryant (33,643).

Sa laing duwa, mipuga og 32 puntos si Aldridge LaMarcus sa dihang gipatugpa sa San Antonio Spurs ang Atlanta Hawks, 111-104.

Ang kadaugan nagpahugot sa ilang paghupot og luna alang sa playoffs nga may 37-29 nga baraha diin ilang gikasawo ang Los Angeles Clippers alang sa ikapito og ikawalo nga puwesto sa Western Conference. Si Trae Young mituktok og 24 puntos aron pangulohan ang nahagsa nga Hawks.

Gilabnot ni Andre Drummond ang iyang ika-16 nga nagkutay nga double-double human tangtangi og tango sa Detroit Pistons ang Minnesota Timberwolves, 131-114.

Si Drummond mitali og 31 puntos ug milangkat kinig 15 ka rebounds nga maoy ikaduhang pinakataas nga sunodsunod nga double-double sa kasaysayan sa prankisa sa Detroit. Sa niaging season, siya nakahimo sa ingon sa 18 ka higayon.

Ang Pistons (32-31) mihaom sa ikaunom sa Eastern Conference samtang ang Minnesota, 30-35, nitidlom sa ika-11. (JBM)