ANDAM na ang Talk N’ Text KaTropa nga makigbinayloay og magduduwa nga maglambigit sa usa sa ilang mga pambato nga si Terrence Romeo.

Usa sa mga ningpadayag dayon og interes mao ang powerhouse San Miguel Beermen, nga giingong andam mobuhi og duha ka mga magduduwa ug future picks aron makuha si Romeo.

Basi sa kasaligang tinubdan sa Spin.ph, si Romeo wala na motunga sa mga praktis sa TNT alang sa sunod season sa PBA ug nag-absent without leave sab kini sa miaging buwan.

Wala sab motunga si Romeo sa Christmas party sa team sa miaging semana.

Nasuta nga dili na maayo ang relasyon ni Romeo sa management sa TNT.

Dihang nagduwa pa si Romeo sa NorthPort Batang Pier, adunay higayon nga nakiglalis kini’g maayo kang coach Pido Jarencio nga maoy giingong hinungdan nga nabalhin siya sa TNT.

Ning puntoha, wala pa masayri kon unsa’y hinungdan nga naguba ang relasyon ni Romeo sa management sa KaTropa. (ESL)