GIPANGKITKIT sa Cebu Sharks-Casino Ethyl Alcohol ang Soccsksargen Marlins, 89-57, aron irehistro ang ilang ikaunom nga kadaugan sa Maharlika Pilipinas Basketball League (MPBL) Lakan Season niadtong Biyernes sa gabii, Oktubre 4, 2019 sa Strike Gym sa Bacoor.

Ang Sharks, nga ningsaka sa 6-9 nga rekord, nakapahimulos og insakto sa kamangtas nga gipakitang duwa sa ilang sentro nga si William McAloney.

Ang produkto sa University of San Carlos (USC) Warriors miguba sa depensa sa Marlins pinaagi sa dagkong mga numero nga iyang gipangmugna, 27 puntos ug 17 rebounds.

Nagkanayon si McAloney nga igo lang siyang nagtutok sa iyang obligasyon sa ilawom nga bahin.

“I just did my job. I did my best to help the team especially on the glass. The points were just a bonus. I was just lucky,” matod ni McAloney.

Ang Marlins, nga wala pa nakatilaw og kadaugan, nagsalimoang na sa pagsugod pa lang sa duwa ug nalubong kini’g dobleng numero nga mga puntos sa halftime, 35-17.

Nakapaneho na og kadaugan, mas nagbangis ang Sharks ug giinat nila’g samot ang ilang labaw sa 3rd quarter ug wala na molingi pagbalik.

Si Michael Cenita nidugang og 13 puntos alang sa Sharks samtang niamot og 10 puntos si Kevin Villafranca. (JNP)