NAKATAKDANG makighugpong ang beteranong free agent nga si JR Smith sa Milwaukee Bucks., nga nagpangita og wing shooter alang sa ilang kampanya sa umaabot nga season sa National Basketball Association (NBA).

Si Smith, kinsa dako og natampo sa paglangkat sa Cleveland Cavaliers og kampiyunato niadtong 2016, nangita na sab og team nga kabalhinan human nakalusot ang iyang waivers.

Dili pa lang dugay, gibuhian si Smith sa Cavaliers.

Gikataho nga interesado ang Bucks nga mokuha sa 33 anyos nga magduduwa.

Sa laing bahin, gikuha sa Indiana Pacers ang free agent guard nga si Justin Holiday, kinsa miuyon sa usa ka tuig nga kontrata nga nagbalor og $4.8 million.

Si Holiday nagduwa sa Chicago Bulls sa miaging season diin nag-average kini og 11.6 puntos ug 4.4 rebounds sulod sa 38 ka mga duwa.

Gikinahanglan sa Pacers si Holiday aron makatabang og tapak sa haw-ang nga nabiyaan sa ilang naangol nga pambato nga si Victor Olapido.

Gilaumang dili pa makapakita og aksyon si Olapido sa mag-unang duha ka mga buwan sa sunod season. (AP, ESL)