NAHILAKIP ang produkto sa University of the Visayas (UV) Green Lancers nga si Rey Suerte sa lima ka umaabot nga rookies sa Philippine Basketball Association (PBA) nga ipahuwam sa Gilas Pilipinas national pool alang sa pagpangandam niini sa 2023 FIBA World Cup nga ipahigayon dinhi sa nasod.

Ang uban mao sila si Isaac Go, Allyn Bulanadi ug ang kaluha nga sila si Matt ug Mike Nieto.

Ang PBA ug ang Samahang Basketbol ng Pilipinas (SBP) nagkasinabot nang daan nga adunay special draft nga himuon alang sa lima ka mga magduduwa.

Ang special draft ipahigayon sa dili pa sugdan ang regular nga 2019 PBA Rookie Draft karong Dominggo, Disyembre 8, 2019 sa Robinson’s Place sa Ermita.

Magpabilin ang lima ka mga magduduwa sa national training pool hangtod nga buhian sila sa Gilas Pilipinas aron makaduwa na’g sugod sa ilang tagsatagsa ka mother teams sa PBA.

Sa drafting, ang labing unang mopili mao ang Columbian Dyip. (ESL)