NINGPATIGBABAW ang panagpares nila ni Darwin Tabal ug Sgt. Eugene Delposo sa 5-kilometer tandem category sa Bayani Run nga gipresentar sa Ford Forza Sports Foundation kagahapon sa Centcom Camp Lapu-Lapu sa Lahug, Cebu City.

Ang duha minghuman sa lumba sulod sa 23 ka mga minutos ug 31 ka segundos.

Si Tabal, kinsa usa sa mga sumosulbon nga runners sa Sugbo, ig-agaw ni Southeast Asian Games gold medalist ug Olympian nga si Mary Joy Tabal.

Miangkon sa ikaduhang dapit mao ang panagpares nila ni Rachel Cabido ug Lineil Ryan Purpura sa Philippine Army nga mirehistro og 27:35.

Ang 3rd placer mao ang laing sakop sa Philippine Army nga sila si Wiljun Neri ug Kota Koide nga mitali og 29:06 nga oras.

Ang lumba, kansang benepisaryo mao ang Help Educate and Rear Orphans (Hero) Foundation Inc., gisalmutan og 100 ka military men ug mga mahiligon sa dagan sa Sugbo.

Sa individual 5K men’s category, si Joseph Villanueva maoy midaog sa oras nga 20:26 samtang si Patricia Tumulak (29:43) sa women's. (RSC, ESL)