GUMIKAN sa pagkuyanap sa coronavirus disease 2019 (Covid-19), taodtaod na sab nga na-knockout ang kalibutan sa boksing.

Hinuon sa umaabot nga duha ka mga semana, hinayhinay nang mobangon ang kalibutan sa boksing.

Karong Hunyo 9, 2020, ang Top Rank boss ni Bob Arum mopahigayon na'g balik og promosyon sa Las Vegas, USA.

Hinuon, dili na kini sama kaniadto. Usa sa tatawng kalahian mao ang kamingaw sa Las Vegas ning panahuna nga daw nahisama na kini sa usa ka ghost town.

“We have never been into anything like this even remotely before,” pasabot ni Arum sa interbyu sa www.philboxing.com.

“I am 88 and I've never seen anything like this in my lifetime and so hopefully, intelligently we find a way of doing what we can before we're able to operate in the normal way we did in the past.”

Matod ni Arum nga nakigtambayayong sila sa Nevada Boxing Commission ug Nevada State health authority aron paghan-ay og programa nga makabalik ang boksing ug maseguro ang kaluwasan sa tanang mga nahilambigit.

Giangkon ni Arum nga lisod ang pagpahigayon og promosyon ning kasamtangang sitwasyon apan iyang paningkamotan ang tanan aron makabangon lang ang boksing gikan ning krisis sa kahimsog. (ESL)