Kon walay mga kakulian, makaandam na ang mga team sa Philippine Basketball Association para sa ilang 46th Season nga magsugod karong tungatunga sa Hunyo 2021.

Gipanglantawan nga karong adlawa, mahuman na sa ilang unang RT-PCR ang tanang teams para makapahigayon na sila og 5 on 5 scrimmages.

Ang Meralco Bolts maoy unang nagpa-Covid test ug posibleng makasugod sa ilang 10 ka adlaw nga bubble training didto sa Laoag, Ilocos Norte ugma, Mayo 15.

Ang NLEX Road Warriors, Blackwater Elite ug Rain or Shine Elasto Painters nka-schedule sa ilang inisyal tests niadtong Martes ug misunod ang ubang mga teams kagahapon ug karon.

Ang matag player, staff sa team usban og Covid test, duha ka adlaw sa dili pa magsugod ang ilang training camp nga posible ang tanan makapraktis na karong Mayo 20.

“Naunang nagpa-test ang Meralco. Pwede na silang magsimula ng ensayo by May 15,” matod ni PBA commissioner Willie Marcial.

Ang TNT KaTropa nagplano usab nga mag-bubble training didto sa Laoag gumikan sa imbitasyon ni Ilocos Norte Gov. Matthew Manotoc.

Samtang ang Blackwater, Phoenix ug Alaska maoy mga teams nga nagkonsidera sa ilang bubble training didto sa Batangas City. Base sa resolution nga giaprobahan sa IATF, ang mga team sa PBA mahimong makapahigayon og bubble training sa mga lugar nga ilawom sa GCQ o MGCQ. (PAC)