Gibulsa sa Truck N Trail ang inaugural nga titulo sa Mandaue’s Pride Basketball Association (MPBA) Summer Cup human gipaluhod ang ARQ Builders, 87-76, sa championship game niadtong Sabado, Hunyo 3, 2023, sa Mandaue City Sports Complex.

Sila Ajing Rosano, Jeric Gonzaga, Albert Ardiente and Zaoinyl Rosano pulos mikamada og double figures aron imaniho ang Truck N Trail ngadto sa makabungog nga kadaogan.

Si Ajing Rosano mialsa og 16 puntos, miamot og 15 si Gonzaga, mitunol og 11 si Ardiente samtang si Zaoinyl Rosano mitampo og 10.

Ang northern conference champion nga Truck N Trail milabaw og 10 puntos sa sayong bahin sa duwa, apan mibalos paghambat ang ARQ aron isikit ngadto sa 39-42 human sa first half.

Nagpauwan og tres samtang mibuhat og fastbreak plays sa third quarter ang Truck N Trail aron ibalik sa double digit ang labaw, 67-57.

Nakabuylo pa pagbalik ang ARQ gamit ang mini run aron maduol ang iskor ngadto sa 72-78 sa nahabiling 4:07 sa duwa. Apan didto ra kutob kay si Ardiente mitimon man sa 7-2 run sa Truck N Trail aron ilansang na ang duwa, 85-74, nga adunay 1:42 sa oras.

Si Ervin John Minoza maoy nangulo sa ARQ sa iyang 17 puntos, samtang si John Elmer Villabrille adunay 12.

Sa exhibition match, midaog ang MPBA Selection batok Winzir, 115-62. Si Gio Antigua mipuntos og 26 alang sa MPBA, si Vince Albingco midugang og 21, samtang si Janjan Mayol adunay 15. (RSC)