NADUGANGAN ang koleksyon sa UV og championship trophy human gipatigbabawan niini ang Under-15 division sa Cebu Youth Basketball League (CYBL) preseason tournament.

Gipangbuntog sa UV ang Sacred Heart School-Ateneo de Cebu (SHS-AdC), 55-43, sa championship game niadtong Dominggo, Hulyo 21 sa SHS-AdC Mango Ave. campus gym.

Sa pagpangulo nila ni Brian Santhony Toring, Denisvee Ryan Sinoy ug Lawrence Petchan, ang UV nakamugna og 17-3 aron pagposte og 53-40 nga labaw sa nahabiling 1:05 minutos.

Gipangulohan ni Petchan ang kadaugan pinaagi sa iyang 12 puntos samtang nidugang og 11 puntos si Franc Gabunada. Kini maoy ikaduhang titulo sa UV sa CYBL pre-season sunod sa ilang paghari sa Under-12 division niadtong Hulyo 13.

Sa Under-18 division semi-finals, ang Batang Mandaragat ningbuntog sa Sisters of Mary School (SMS-Boystown) Aloysians, 61-55. Sa finals, ang Batang Mandaragat makigharong sa modaog laing semi-finals showdown tali sa SWU-Phinma ug Mt. Olives School of the Philippines. (RSC, ESL)