Bisan sa kasihag sa social media page sa Sugbo Bike Lanes Board kalabot sa ilang pagtukod og Bike Patrol, daghan gihapon ang wa masayod niini. Ako sab gani ning gisuwat as news ug gipublikar aron masayod ang publiko sa iyang katukoran ug mga function.

Apan daghan gihapon ang wa masayod. Dunay nag post sa Facebook page sa Cebu Road Heroes kalabot sa bike patrollers nga nagsugod na og suroy sa kadalanan aron bantayan ang mga bike lane.

Gi-orient ni sila sa mga balaud ug ordinansa sa trapiko sa nasod ug Dakbayan sa Sugbo kay ilang tahas mao ang pagpanakop sa mga nakalapas sa balaud sa trapiko may labot sa bike lanes. Labina gyud sa mga probisyon sa bike lane ordinance sa dakbayan.

Gawas niini, gibansay usab sila sa pag-ayo og biseklita aron kon dunay madautan sa ilang two-wheeled nga sakyanan, makatabang sila sa pag-ayo ini. Hayan duna silay bike tools nga dala. Sama gud sa amoang mga ride kaniadto, among sweepers naay dala nga tools aron makatabang, sama sa pagkaputol sa kadena.

Gibansay usab sila sa first aid aron makatabang ni bisan kinsa nga naa sa karsada nga nanginahanglan og tabang.

Busa, di ta makaingon nga way kapuslanan ang bike patrol.

TABANG

Ang Cebu City Transportation Office (CCTO) dako kaayo og suliran sa trapiko sa Dakbayan sa Sugbo. Busa, kon dugangan pa ang pagbantay sa bike lanes, magsangkiig na sila. Kadaghan ra ba sa mga badlungon sa dan.

Ubos sa ilang officer-in-charge Lyntoni Alburo nagpatabang sila. Busa, ang board nakahukom sa pag-umol og bike patrol, kansang tahas mao ang pagbantay sa bike lanes. Karon, maka focus na ang traffic enforcers sa pagbantay sa kadalanan, pagdakop sa mga makalapas sa balaud sa trapiko. Ang pagbantay sa bike lanes iyaha na sa Bike Patrol.

Karon, naa pa sila sa information and education sa public.

Di usab maayo nga dali-dalion ang pagpanakop kay bisan unsaon, daghan pa sa mga tawo ang kinahanglan pang i-orient kalabot sa ordinansa sa Siyudad.

Sa ako nang giingon naa na man ning bike lanes, kitang bikers kinahanglan nang mogamit niini.