Wala pa masayri kon kanus-a makabalik og duwa si TNT Tropang Giga guard Jayson Castro human kini naangol niadtong Oktubre 22, 2020 atol sa kadaugan sa Tropang Giga batok sa Blackwater Elite sa Philippine Basketball Association (PBA) Philippine Cup sa AUF Gym sa Angeles City, Pampanga.

Si Castro nakasinati og angol sa iyang tuo nga bagtak atol pa lang sa warm ups hinungdan nga wala siya nakapakita og aksyon sa maong duwa diin mingdaog ang Tropang Giga.

Ang Tropang Giga maoy kasamtangang naggunit sa liderato sa PBA bubble dala ang 5-0 nga rekord.

Gipasabot ni TNT coach Bong Ravena nga dili niya gusto ahaton pagpaduwa si Castro.

“Tight kasi ‘yung right calf niya eh,” pasabot ni Ravena nga napatik sa pba.ph.

“Hindi namin pwedeng i-risk eh. Like, it happened to us before with Roger (Pogoy), na naglaro pa. But itong kay Jayson, ayaw na namin mangyari ulit. We’d rather let him rest, because next week, we have three straight games eh, every other day games,” he added.

Bisan wala si Castro, ang Tropang Giga aduna gihapon saktong puwersa pinangulohan sa Sugbuanong si Roger Pogoy lakip na sila si Ray Parks ug Simon Enciso. Si Castro, kinsa nag-edad og 34, nag-average og 16 puntos, 5.5 assists, ug 3.5 rebounds. (ESL)