TALIWALA sa iyang pangidaron, gipamatud-an ni James Yap nga aduna gihapon siya’y ikabuga pinaagi sa pag-agak sa Rain or Shine Elasto Painters sa sunodsunod nga kadaugan sa wala pa ang FIBA break sa Philippine Basketball Association (PBA) Philippine Cup.

Sulod sa lima ka mga adlaw gikan niadtong Pebrero 8 hangtod 13, ang Elasto Painters adunay grabe ka hugot nga eskedyul diin tulo ka mga duwa ang ilang gipangsagubang.

Ning mga duwaa, naagak ni Yap ang Elasto Painters sa kadaugan nga maoy hinungdan nga napili siyang labing bag-ong PBA Press Corps Player of the Week awardee.

Si Yap, kinsa nipatong sa iyang ika-37 nga adlawng natawhan niadtong Valentines Day, nag-average og 13 puntos, 4.0 rebounds ug 1.6 assists.

Human niini, ang PBA temporaryong mipaundang sa ilang mga kombati aron paghatag og agianan sa kampanya sa Team Pilipinas sa 6th window FIBA World Cup Asian qualifiers.

Sa kasamtangan, ang Elasto Painters maoy nag-una sa standing sa Philippine Cup dala ang 7-1 nga rekord. (ESL)