Inspirado sa kadaugan ni Eumir Marcial sa Tokyo Olympics, ang fifth-ranked Zamboanga City JPS mipakaging sa inilog nga Clarin, 70-68, aron pagsakmit sa kadaugan sa Game 1 sa 2021 Chooks-to-Go Pilipinas VisMin Super Cup best-of-three semifinals sa Pagadian City Gymnasium niadtong Dominggo, Agusto 1, 2021.

Ang presensiya ni Jerome Ferrer sa ilawom nga bahin maoy nahimong yawe sa kadaugan sa Zamboanga batok sa second-seed Clarin.

Nagtabla, 66-66, sa fourth quarter, si Ferrer sunodsunod nga nakadawat og pasa gikan ni Mac Cardona ug Fran Yu nga bugnaw kaayo niyang napasulod taliwala sa hugot nga depensa, 70-66.

Diha pa unta’y kahigayunan nga makatabla ang Clarin nga makadaog pinaagi sa tres human sa duha ka free throws ni Joseph Eriobu ug sa krusyal nga error nga nahimo sa Zamboanga sa katapusang 19.2 segundos.

Apan ang hugot nga depensa sa Zamboanga maoy nagtukmod sa Clarin ngadto sa kapildihan.

Sa tinguha nga dili maabtan sa oras, napugos ug nasipyat si Carlo Lastimosa sa Clarin sa iyang itsa sa three-point area.

Nakakuha man tuod og offensive rebound si John Wilson apan naabtan ra usab kini sa oras nga wa gani makasuway sa pag-itsa.

“Our defense was tighter today because we knew they have good wingmen with good shooting hands. John Wilson did not score double digits. That was a big thing for us,” matod ni Zamboanga head coach Tony Pardo kansang batos mosuway pagtapos sa semis series karong adlawa.

Sa kadaugan mapasigarbuhon ug gihulagway ni Mike Venezuela sa MVL Sports ug Kap James Siason sa Zamboanga nga usa ka double celebration ang nahitabo niadtong Dominggo.

Sanglit kini nahitabo pipila lang ka oras human midaog usab ang Zamboangueno boxer nga si Eumir Marcial sa Tokyo Olympics batok sa inila usab nga si Arman Darchinyan sa Armenia sulod sa first round.

Ang kadaugan sa lumad nga taga Zamboanga City maoy naghatag kaniya lingkuranan sa semifinals round sa middleweight class ug nagkinahanglan na lang og duha ka daog aron malangkat ang unang gold medal sa nasod boxing Olympics. (JBM)